dimanche 30 janvier 2011

كيكة النسكافيه


 المقادير:
4 بيضات
زلافة ماء
زلافة زيت
زلافة سكر سنيدة
4 خمارات حمرين
خمارة بيضاء فانيلا
قبصة ملح
3 ملاعق نيدو
1 نيسكافي مذوبة في ربع كاس ماء
25 غرام كاكاو
الدقيق حسب الخليط
(كوك + عسل) او لوز او كركاع للتزيين اختياري
الطريقة :
نخلط البيض (لي غادي يكون خارج من الثلاجة قبل بشوية) مع سنيدة و قبصة الملحة و انا كانطرب بالخلاط اليدوي ( لي عندها الخلاط الكهربائي تستعملو يكون احسن)نزيد الزيت و الماء و القهوة الذايبة و الفانيلا و نيدوو الكاكاو مع التحريك المستمرحتى يتجانس الكل مع بعضو عاد نبدى نزيد فدقيق( الفورص لي مغربلاه و يكون ديال الحلوة ) نستمر في التحريك حتى تولي العجينة ماثقيلة ماخفيفة..
نوجد المول لي غايدخل الفران كالعادة مدهون بالزبدة او الزيت و مرشوش بالدقيق و نخوي الخليط كامل نرشو باللوز مهرمش او الكركاع اختياري و نكون مسخنة الفران..
ندخلها تطيب على عافية مهيلة و مني تخرج نقدر نزينها باي حاجة متوفرة او نخليها عادية..
ملاحظة :
هاد الكيكة كاتجي كبيرة و كثيرة و كاتبغي مول يكون كبير
و كاتصلح لمناسبات..
نتمنى تجربوها و تعجبكم كي عجباتني ..
الى عجباتكم دعيو معايا دعيوة تالخير و الى ماعجباتكمش عافاكم ماتدعيوش عليا..
في امان الله
كيكة النسكافيه
 

5 commentaires:

Anonyme a dit…

الله ايعطيك الخير

Anonyme a dit…

tebarekelh 3elik wa che maye mekenechi ne seta3emelweha bela nido w achokeran omo ramzi

ANWAL انوال حلويات a dit…

الى ام رمزي

قريبا سانزل كيكة بالكاكاو و الماء فقط بدون نيدو و كتكون هشيشة بزاف و غزالة

Anonyme a dit…

تبارك الله عليك جاتك غزالة
الله ينولك اللي فبالك ويحقق مبتغاك

Anonyme a dit…

gzala tbrklah